DINE PLAKETE PALO AŽUTIPE E RROMANE INTEGRACIJAKO

Plakete si dine e šerutne manušešće po Pokrajinako gavermento, Vuče sikavnjako strukaće studijengo pale anglalsikavne „Mihailo Palov“ andar o Vršco, F.S. „Mileta Protić“ andar o Tovariševo, Petrošće Nikolićešće, RTV Vojvodina thaj Trifunošće Dimićešće savo mulo 2001 brš.

 

Vuče sikavnjako strukaće studijengo pale anglalsikavne „Mihailo Palov“ andar o Vršco dini si e plaketa palo ažutipe ando proceso e integracijako thaj vazdipe e trajosko pale Rroma thaj Rromnja ande AP Vojvodina. Ljiljana Mihajlović, v.d. šerutnjako pe Kancelarija pale inkluzija e Rromenđi dija e plaketa pale šerutni Jelena Prtljaga ande Vuči sikavni palo sićope.

 

- Kamav te naisarav pe kava importantno paćiv thaj te mothav kaj majbut katar 10 brš malavas but importantne partneri ande Kancelarija pale inkluzija e Rromenđi thaj Pokrajinako gavermento thaj das paćiv po ažutipe savo avel lendar. Von si amenđe importantne pale promocija amare sikavne thanesko, palo informišipe rromane themesko kaj si sikavno than pe savo šaj te sićon pe pešći dejaći čhib“ – mothoda e Jelena Prtljaga.

 

Ando kamipe te vi majdur buhljarrdol institucionalno araćhipe rromane čhibjako, e Kancelarija pale inkluzija e Rromenđi thaj e Matica rromani, trujal o ažutipe e Pokrajinaće sekretarijatova palo sićope, 2009. brš poteljarrdine e inicijativa palo fundosaripe e studijaće programosko palo sićope e anglalsikavnengo pe rromani čhib pe Vuči sikavni strukaće studijako palo sićope anglalsikavnengo „Mihailo Palov“ ando Vršco, ando trinbršesko trajo. E planova si gndino te sajekh brš ramolpe deš studentuja po budžeto. Pale studentuja e Kancelarija arakhla e stipendije, bešipe ando studentikano ćher, lila sar vi aver buća save trubun palo nakhavipe e sikavimasko.

 

O.V.