ĐES PUTARRDE VUDARESKO VUČE STRUKAĆE THAJ SASTARRNE SIKAVNJAKO ANDO VRŠCO

O đes sas nakhkado e kamimava te ćerelpe e promocija palo sićimasko lundžaripe rromane čhavorrengo, sar vi vazdipe lenđe motivacijako palo ramosaripe pe vučesikavne thana ande Srbija. Ande kava kotor dija svato o Miroslavo Lepir, membro ando forosko konsili palo sićope, ando Foro Vršco. E manušen save

avile sas šajipe te pindžarrdon e programova sikavne thanesko, e sikavnenca, te phiren po sikavno than thaj studentikano ćher.

 

Therrdine pherrdimašće alava katar e dr Danica Veselinov, šerutni po sikavno than, sar vi katar e profesorka dr Marija Aleksandrović, šerutni pe katedra e programošći pe rromani čhib. Von dine informacija palo sikavno than, programo, sar te ramolpe, sar vi šajimata save del len o sićimasko lil palo majlačho avutnipe. Paše godova, e Ljiljana Mihajlović, šerutni pe Kancelarija pale inkluzija e Rromenđi dija informacija palo programo pale stipendije savo nakhavel e Kancelarija trujal o ažutipe e Pokrajinaće

Gavermentosko thaj ažutipe savo del e Kancelarija ande lengo sićope. O menadžeri e programosko ande Fondacija palo sićope e Rromengo, o Adi Sinani dija zor e sikamnenđe te džan pala pešće sune thaj maj lačho avutnipe, inkalimeva kazom si importantno o sićope thaj araćhipe rromane kulturako thaj tradicijako.

 

Sa e manušen sas šajipe te ašunen čhefal sas o therrdo aresipe e lačhe rromane studentonengo thaj alumnengo sikavne thanesko, save si ađes paćivale membruja akademikane themesko ande Republika Srbija, save ćeren pe importantne thana, sar žurnalistuja thaj urednikuja po Themutno serviso, pedagogikane asistentuja thaj vinaja save lačharen neve akademikane forutne, sar vi e koordinatorka pale rromane pučhimata. Baro naisaripe pale sikamne FS “Đura Jakšić” andar o Pavliš, save nakhade o ćhelarrno programo.