BARABARIKANE ŠAJIMATA SA E ĆHAVORENĐE

Bući pedagoško asistentosi si te inzarel loćaripe thaj đipherutno dumo sikavnenđe sar kaj si ljenđe trubuimatanca. Ćhutinde si vi barardine kontaktora e romane kupatnimasa thaj e familjijenca sikavnenđe, o dad thaj e dej siljen majlaćhe kontaktora e sikljavnenca, ciknardo si aćhipe andar o sikavnipe, e sikljavne aćhen ano sistemi sićimasko, laćhardolpe antidiskriminativno kultura ane institucie thaj laćhardonpe e situacie diskriminaciaće.

 

Kana vaćara katar e bući pedagoško asistentosi trubuv te vaćarav kaj si gova jekh kompleksno bući. Ljesi rola dićholpe maj anglal po dumo ano sikavipe ćhavorengo andar haćardine grupe bešutnenđe, bući e ćhavorenca save aven andar e gavutne thana.

 

Sar vi an aver bući agijate vi ane bući pedagoško asistentosi si laćhe thaj majcrra laćhe momentora. Akala dujto momentora dićhonpe an gova kaj e romane ćhavore ni aven svako đive ane sikljarni, thaj gova ljenđe phararel te sićon.

 

Akava probljemi si vi hembaro probljemi an munri sikljarni andar o sebepo kaj hasardolpe o kontinuiteto po nakhlo sićope ja trubusara e sikljarnenca te irisaramen pe disave teme sar te avenasa ane situacia te „pherdaren“ hasardino sebepo aćhimasko. Trubul te arakhadolpe hemlaćho drom, te rešisarelpe svako jekhutno probljemi.

 

Vi paše but provokacie savenca dikhljardivav sva- kođive šaj te vaćarav kaj si o akharipe pedagoško asistentoso bareiljese karaktereso, dićholpe ano laćhipe bućarimaso e ćhavorenca kaj svako đive šaj te ašunav vi disave asavne mothimata karakteristikane e ćhavorenđe, but anegdote phandine e ćhibatar thaj lako ljindipe kaj ikhaljel asavimata.

 

Bahtaljipe si majbaro kana bitisaren maškarno sikljaripe. Te sem me pe disavo ćhand therutno akaljese, palje gova munro ćajljardipe si but baro.

 

O.V.