ČHUDE BILAČHIE SAVO ĆERElPES OPRAL MANUŠNJA

26/11/23 | 13:40

Vakti: 1 min.

Bilačhipe opral manušnja si jekh katar majbare pharimata ađes. Andar godova rezono ando than Bački Petrovac, po 23. Juno 2015. brš, e angluni andar ćidipe „Čiriklji“, Danijela Mihajlović, sikada o projekto „Stop nasilju nad Romkinjama“ (Ačhadipe bilačhimasko opral Rromnja“), savo učharda Pokrajinako sekretarijato pale privreda, bućaripe thaj jekhetanipe polurjengo.

Foto: A. Mićić

Po teljaripe maladimasko, Danijela Mihajlović inkalda e informacije save si phangle e bilačhimava opral manušnja savo si, po bibaht, ando baripe. Voj mothoda kaj e analize sikadine kaj kola save ćeren bilačhimata ande 78 procenturja si e unsurimatarja, nakhle unsurimatarja jal partnerja, 9 % si čhave, 4,2 dada, 2 % čheja, a deja jal sokra 1,6 % thaj kaj po sa jekh čhon 2-4 manušnja hasaren o trajo.

Pale kola save ćeren bilačhimata naj jertimata thaj bilačhipe naj ladžavipe kolengo savo bilačhipe haćardine no e kolengo save bilačhipe ćerdine. Na te paćan ande godova kana o bilačhimatari rovel jal kana mothol kaj či godova ćerela palem, ćinel tumenđe luluđa, inđarel tumen ando restorano thaj aver.

Kova so ćerelpes ande praksa si te e manušnji kana po angluno drom jertisarel bilačhipe, godova vrjamasa lundžarelape thaj ćerelpes butimasa, majbut droma thaj avel sa majphare thaj majzurale“, liparda e Mihajlović. Voj majdur mothol kaj kova so trubul te ćerelpes kana avel džiko bilačhipe si arakhadipe sar phandadipe vudaresko ćijasa jal našavipe ćherestar.

Tale godova trubulipe si te akharelpes e kutarja po đindo 192 jal udžilimasko kotor Tumare guvernako thaj te mothos e adresa. But semno elemento si džalipe ko sastarno thaj rodipe lilesko pale dukhaldimata save majpalal avela sar sikadipe po krisi te ćerelpes te avel džiko teljaripe procesosko.

Majdur, kova so si but semno te san mašlar kola save haćardan seksualno bilačhipe bivojako si kaj či troman te najarentumen, no te džan sigo ko sastarno palo čačaripe.