Rromano-Dasikano alavari

Po Maškarthemutno sajmo lilengo ando Beogrado po khetanimasko štando sa vojvodinaće minoritengo sikadini si vi o „Romsko-srpski rečnik” katar Alija Krasnići. Kava autoro si membro Ćidimasko lilarnengo Srbijako, sar vi Komisijako palo trajo thaj adeturja e Rromane ande SANU.

 

Po bibaht, amenđe e Rromenđe trubun inke but sićope kaj naj sam zainteresuime kozom trubusaras pala kasave promocije, te pindžarasmen thaj te das svato e amare lilarnenca save ramosaren pe rromani čhib, savo piro trajo dine pala rromano lilaripe. Ađes si kate cîra zainteresuime manuša te diućhen thaj te ašunen vareso pe piri dejaći čhib thaj te pindžaren e manuša save bućaren ando kava kotor.

 

Nakhline šov brša kana inkljisto kava alavari savo inćarel 70,000 alava, maškar save si vi ikola save si arakhadine dumutnimatar. Gajda vareso dži akana naj inklado pe rromani čhib. Kova so e Rroma andine andar Indija, trubun majbut te lesamaren, pala peste thaj pire čhavorra, te pindžaren pire bučumurja thaj te ćeren sa te majbuhljaren rromani čhib.

 

E Rroma arakhadine piri dejaći čhib odolaći kaj ulade trajin ande mahale, no godoja getoizacija anda lenđe vi majphari inkluzija ando majbuhlo amalipe thaj sistemo sikadimasko. No, inke naj standardurja ande ramosardo rromano alav. Godova naštik te ćerelpes prikal o rjat, kaj si godova lungo proceso ando savo trubun te len kotor sa e Rroma save den svato pe piri čhib.