Aranžmano uže luluđenca

Inćarimasa pe godova kaj e demografikane trendurja den šajipe palo barjavipe đindosko e Rromengo ande bućarni populacija, sasmen ideja kaj e edukacija thaj therdipe neve džanglimastengo maj lačho varo palo arakhadipe bućarimasko jal korkorrobućaripe. Adar godova rezono dijam kurso po savo e manušnja inćardine šajipe te theren praktično džanglipe pala ćerdipe aranžmanosko pale averčhande maladimta, ćerdipe buketonengo thaj aver luluđengo, sar vi te theren informacije pale uslovurja thaj varo putarimasko korkorrune lulađarnako.

 

Aver rezone pala savo o Raspustilište čhinada pala kaja marginaliuime kupa manušnjenđi si fakto kaj pala teljaripe kale bućarimasko či trubun bare fundurja, a majdur kava bućaripe šaj te averčhandelpes vi ando familijako bizniso (krozal ćidipe, šućaripe thaj distribucija luluđarnenđe e trubulimašće materijalosa).

 

Ćidimasko kursosko sas „Amalipe Raspustilište“. Kala kursurja o Amalipe vi majanglal ćerda, a kava sas angluno drom te o kurso ćerelpes thaj delpes Romnjenđe ando kamipe treningosko pala majloko araćhipe bućarimasko, therdipe neve džanglimatengo, ekonomikano zurjavipe thaj promocija katar preduzetništvo.

 

Dićhimasa po baro bahtalipe manušnjengo, lengo gatisaripe te theren neve džanglimata, Raspustilište, dićhimasa pe kapaciteturja thaj infrastruktura save inćarel, planiril te lundžarel kasave treningurjenca, sar kaj si ivendesko programo aranžmanosko luluđasko, treningurja palo suvipe thaj majdur.