O PETRO NIKOLIĆ, MANUŠ SAVO ĆEREL PALE ORRTE E RROMENGO THAJ RROMNJENGO

Čhutimava dujčhibalipe ando programo, sikavelas po araćhipe e rromane čhib jako thaj kulturako pe amare thana. “Sićope thaj bućaripe pe pešći dejaći čhib, araćhipe pešće kulturako thaj te avelpe jekhutno thaj jećhimasko ande orrte thaj musajimata, godova si ašaripe sajekh forutnesko”. Šaj te phenelpe kaj si vov simboli rromane redakcijako. Bućarrno trajo nakhada ande Radio televizija Vojvodinaći katar 1988-2023. Fundosarrda e rromani redakcija thaj ćida timo terrne kooperatonengo save paše žurnalistikani bući ćidenas e materijaluja pale Rroma, araćhenas e rromani čhib thaj buhljarenas e rromani kultura trujal e medije. Trujal kava medijako kanali, e Rroma therrdine šajipe te ašundonpe thaj te lenđe paramiča aven mothodine gajda kaj sikavenale ando čačunipe a na stereotiponenca thaj predrasudonenca.

 

Inicijativa palo fundosaripe rromane redakcijako pe RTV-ći thaj lako majdur trajo anda zurjaripe e krlosko rromane themesko ande Srbija thaj kava medijako kanali si jekh katar majimportantno griža te ando maripe opral e diskriminacija thaj promocija e jekhimasko maškar e manuša ande raštra. Pe kava malavipe sas but akharrde manuša thaj amala saven sas samo šukar alava pale kooperacija e Petrova Nikolićeja.

 

O Prof.dr Draguljub Acković, dikhljarrdo о manuš ando Parlamento Republikako Srbijako inkalda kaj si baro aresipe kaj si amen penzioneri – žurnalisto. Dijape gođi lenđe pindžari masko, ketane teljarimasko thaj mothoda kaj ande sajekh minoritani redakcija musar te avel uredniko andar godova nacionalno minoriteto. O Protojerej Branko Ćurčić naisarrda pe kooperacija, ketane promocijako thaj ćeripe e romologijako. Majbut sasle motivacija te ćerel e Rromenca pale godova kaj e vudara rromane familijengo sas sajekh drom putarrde pala leste thaj kamlasas te godoja kooperacija vi majdur lundžarrdol.