TRADICIJA PURANI ŠOV VEKUJA KE RROMA

Tradicionalno čače si e Rromen i maj importantno. Čače si kaj si godova sumnalipe saveja ažućarelpe e primovara. Kaj majbut ćerelpe o hasaripe? Majbaro streotipo si kaj ćerelpe palo ekskluzivno rromano tradicionalno sumnalipe o Erdelezi, numaj naj gajda.

 

Homogenizacija si but jednostavno proceso ande savo si „sa sar jekh“, so si dićhimasko andar o univerzalno dićhipe e tematikako palo Erdelezi, thaj šokantno si te, ulade ande mainstream medije, naj averčhande tretmano rromane sumnale đesesko no ilustrujime, a kava varesar mothol vi kaj naj averčhandi praksa ando sumnalie e Erdelezijesko osim dreno, lole drzice thaj najaripe ando paj.

 

Či malavena primeri sar jekh rromani familija ande urbano than sumnarel o Erdelezi, ulade na koja, te phenas, avel andar e maškarutni klasa.

 

Šaj te mothas kaj si ezoterija thaj mistika ande paramič palo sumnalo Georgije jal Juraj, hristosko sumnalo kasko si o Erdelezi sumnalo đes ande godoja mitologija. Ando nakhavipe e paramičako palo sumnalo Georgije, ulade ke ortodoksne, kaj si jekh katar retke sumnale saven si duj sumnale đesa (aver si o Đurđic ando novembi), hamilpe e istorija thaj mistika, thaj si gajda prihvatime o sikavipe e Georgijesko sar mudarel e zmajos.

 

Ando paj čhudenpe khude luluđa save šaj te maladon ande godoja vrjama. E bakhres si ulado importantipe ando inćaripe kale sumnale đesesko. Kana den čhuri o bakhro, savo či tromal te avel bijando jekh brš majranije, e familija fuljarel sa bilačhimata pal peste, a čhavorra muršuja godoleja aven majsasteveste thaj majlačhe.

 

Pe godova đes, e Rroma den pe peste šukar, čhon o sunakaj, ašundol o rromano bašalipe thaj ćhelelpe rromano kolo. Pe ćhera čhonpe e krjanguja katar o đurđevko thaj lipa ando sikavipe palo lačhoavilipe e primovaraće thaj lenđe arakhimataresko e Erdelezijesko, savo, ande nesave purane vrjame harado baro džungalipe (Aždaja) thaj gajda arakhada sa e čhavorren po them.

 

O.V.