Bućaripe pala sasto amalipe

Ćidipe e Rromengo andar o than Mokrin, Urma, therda e fundurja talo konkurso Pokrajinaće sekretarijatosko pale privreda, bućaripe thaj jekhetanipe polurjengo palo nakhadipe ašunimašće bućarimatengo. Pale godova, o Miodrag Veldi, šerutno ćidimasko, dija svato amenca pala nakhadipe kale bućarimasko.

 

Ćidipe „Urma“ fundosardo si ando 2003. brš, a primarno kotor bućarimasko sas arakhadipe thaj lesamalipe rromane barvalimasko, krozal tradicionalno rromano đilabipe thaj ćhelipe save nakhdine e membrurja katar kulturno-artistimasko amalipe. Inćardine šukar dikadimata, rezultaturja, sas dosturja pe but thana. Vrjamava, o đindo membrurjengo ćidimasko ciknosajlo, a o ćidipe buhljarda piro bućaripe pe edukacija, sićope, lesamalipe manušikane orturjengo, bešipe, khetanimasko bućaripe aver rromane bivladaće ćidimatenca.

 

Kava ćidipe po Konkurso Sekretarijatosko therda 720.000 dinarja pale poćinimata bućarne manušengo, a kotor lovengo dija vi lokalosko ortuipe Mokrin e 125.000 dinarja, save hasnardine te ćinen e šeja palo bućaripe. Inja manuša bućardinepes pe duja čhona. Maškar lende si e manuša save či agorisardine fundosko sikavno than a save phare šaj te theren bućaripe, sar vi kola save gatisardine fundosko thaj maškarutne sikavne thana, sar vi jekh manuša savo agorisarda vučo sićope. Kala manuša bućardine palo inćaripe pajoskekujbako ando Mokrino, sar ačhavenaspe bare paja thaj talephuvjaće paja save ćerdinepes bršîndimava. Majanglal bućardine ande aver, sar kava projekturja, „Zaštita naselja Mokrina od povišenog nivoa podzemnih voda”, 2009. brš, „Rekonstrukcija i izgradnja uličnih kanala u Mokrinu”, 2010. thaj 2011. brš.

 

Pale duj čhonesko bućaripe angažuime manuša šîladine nakhadimašće thana, šahturja thaj dromarimašće thana, šîladine thaj majhandukuisardine kanalurja thaj inđardine phuv thaj gunoj savo či dija te o paj tromalimasa naćhel. Ando Mokrino kana si bare peradimata šaj te ćerelepes te baro paj avel džike ćhera, no godova si kale bućarimava ačhadino.

 

Dićhimasa pe godova kaj nekozom brša o ćidipe „Urma“ bućarel ane kasave projekturja, e bućarimata sar aresimašće, a e forutne ando Mokrino bahtale. O bućaripe savo ćerdine sas rodimasko, pharo, no po agor dikhlinepes e rezultaturja. Godova si jekh kotor sostar e ašunimašće bućarimata sas semne, a aver kotor arakhas ando fakto kaj e Rroma inćardine šajipe te bućaren thaj te theren poćinimata pala peste thaj pire familije.

 

Šerutno ćidimasko sikada baro naisaripe Pokrajinaće sekretarijatoske pale privreda, bućaripe thaj jekhetanipe polurjengo thaj Lokaloske ortuimaske Kovin kaj zurjardine lenđi ideja thaj kamipe palo bućaripe. Kala ašunimašće bućarimata sikadine kaj e Rroma ando than Mokrin kamen te bućaren tha gajda te anen majlačhipe, niči numa pešće, no vi saste amalimašće. O Miodrag Veldi gîndil kaj kasave akcije trubun majbut te ćerenpes, te sa majbaro đindo e Rromengo lel kotor thaj therel šajipe te bućarel. Paša godova, trubulipe si te araćhelpes sistemsko thaj sevrjamako čhinadipe savo e Rromenđe dela šajipe te aven konkuretne po tržište bućarimasko thaj majbut šajipe palo bućaripe.

 

Talo gatisardo bućaripe savorra (vi e forutne andar than Mokrin thaj e Rroma save therdine šajipe te bućaren) sas čaljarde thaj bahtale, a godova si majbaro sikadipe kaj e ideja katar ašunimašće bućarimata aresimasa sas gatisardi thaj anda kamlimašće rezultaturja.