INTERVJU BORO NIKOLIĆ THAJ „SUBOTICAĆE SOLISTUJA“ – JEKH KATAR MAJKAMLINE BAŠAVNE ANDE JUGOSLAVIJA

Semas ko Boro Nikolić andar e Subotica, savo fundosarrda bašalni grupa „Suboticaće solistuja“ thaj dam svato pala lesko barjaripe, familija, sićope, bare nastupuja thaj angažmanuka, palo kvaliteto e muzikako varekana thaj akana, sar vi pala lešće muzikaće naslednikonengo.

 

Bijando sem ande Selenča, cinorro gav paše Deronje. Mungrro dad Živko đilabelas po basprimo thaj gajda lelas palo trajo, a e dej Jovanka sas phangli pale ćherešće buća. Kasavi vrjama sas atoska. Ande familija sas štar čhavorra, me semas majpurano.

 

Cinorri muziško škola, mungro harmonikako profesori Robert Ditri, jekh but lačho manuš saveja me već atoska ćeravas e koncertuja, akharrda mungrre dade thaj mothoda lešće kaj musaj te ramolma ande maškarutni muzičko škola thaj kaj si šteta te o talento savo sima či avel lino sar trubul.

 

Pe lesko svato, ramosarrdem maškarutni škola ande Sombora, a na ando Novi Sad, pale godova kaj ande godoja vrjama e somborošći maškarutni škola „Petar Konjović“ sas jekh katar majlačhe ande sasti Jugoslavija.

 

Nekobor čhon palem godova kana lem rromnji thaj palem mungrri migracija ande Subotica, therrdem ponuda katar jekh but lačho orkestro savo đilabelas ando hoteli „Patria“, savo ande godoja vrjama sas majelitno ande Srbija.

 

Therrdem but lačhi ponuda thaj lijem o angažmano. Amaro repertoari sas pe themutno niveli. Đila- basas šansone, operete, italijanske arije, čardaš, džezo thaj soul, šlagerja, evergrin, puraneforošći muzik.

 

O čhavo Milošo si profesori lautako thaj vo inćarrdol samo ozbiljno muzikava. Či interesujisarrdale e đilabimata ande restoranuja, vel samo đilabel ande koncertne uslovuja. Me sem but bahtalo pala godova. Mungrri majpurani unuka, bašavel po klaviri ande cinorri muzičko škola. Butivar lasa vežbiv thaj musaj te mothav kaj si but talentovano. Kamlemas te lundžarel e dadešće thaj papošće pungrrenca.

 

O.V.