Bašalimava Džiko Majlačho Avutnipe

Ando ćher štaredženenđi familijaći Petrović andar Beška sa jekh vrjama ašunelpe čhavrrikano rîknjipe thaj bašalipe. No, tala kaja, po dićhipe, šukar paramiči, garavelpes pharo trajo thaj baro bućaripe korkorrutne dadesko te pala pire čhavorrenđe therel kvalitetno trajo, sar vi zumadipe leske čhavorrengo te ažutin lešće ande godova. No, vi paše sa bibahtalimata, kava si paramiči pale familija savi si pherdi kamavimasa, kamlimasa thaj kamimava palo anglunipe.

 

Kana majanglal efta brša Dragan Petrović ačhilo sar korkorrutno dad, haćarda kaj najles vrjama palo tristipe, no musaj te bućarel majphare sar pire čhavenđe therela šukarimasko trajo. Musaj te sićol te korkorro ćerel sa so si ando ćher thaj te ažutil čhavenđe ando sićope. Dragano si trin čhavrra: Radovan, Dejan, Dragan. Dejan thaj Dragan džan ando fundosko sikavno than, a o Radovan ando septembro teljarela ando maškarutno sikvimasko than ande Inđija. Sar korkorro mothol, von but ažutin lešće, von si lačhephare bućarne, a sa godova del lešće zurjavipe te či perel angal pharimata, no te lundžarel vi majdur te marelpes, te čhavorrenđe therel majlačho avutnipe.

 

Kaja familija jekhutno čhonesko therdipe lovengo inćarel katar socijalno ažutipe thaj čhavrrikano poćinipe, no godova naj kozom trubul, gajda kaj o Dragano musaj te araćhel vi aver poćinimata. O bućaripe či arakhla, gajda kaj teljarda te ćerel kova so šaj jekhutnimasa – a godova si te bašalel. Lešće čhavorra katar ciknjarimata sikadine intereso pale muzika thaj sićiline te đilaben. Gajda e familija Petrović ćerda o bendo thaj teljardine te đilaben pe vašarja, gavutne sumnale đesam sar vi pe lošanimata, boldimata, abjava. O đilabipe avilo sar lengo poćinipe, varo te therel love, te rheren fundurja palo trajo. Dragano mothoda kaj po teljaripe sas but phare, no dikhla kaj si godova jekhutno varo te therel love. Odolaći von štar džene furjardine e patave pe peste, gatisardine instrumenturja thaj bešena ando vordon savesa dromardine džiko than kaj trubun te đilaben.

 

O Dragano mothol kaj sas phare te e čhavorra mištarenpes e sikavvne thanesa, sikadimava thaj bašaldimava. Pe godova trubul te liparelpes vi godova kaj nakhline saturja palo sikadipe bašaldimasko sar vi neve điljengo. No, o Dragan Petrović či dija te palo bašaldipe te lenđe čhavorra mećhen o sikavno than, thaj sa trin čhavrre lačhe sićon. Đilabipe thaj bašaldipe si lengo zanato, varo te theren love palo trajo thaj kova si so lengo dad sikada len, no vo pala lende kamel vi vareso majbut. Kamel te von aven sikade manuša save ando trajo therena baripe. Majanglal kamel te lendar ćerel paćivale, bare, pharebućarne manuša save inćarena vi udžilimata pala sa kova so ćeren.

 

Khonik lendar naj sikado đilabimatari, savorra ašunen „po kan“, nno godova či ačhaven len te lošanin ando đilabipe thaj pire bašaldimava te ođaren e manušen. O Dragan kamla te maj purane čhaves ramosarel ande đilabimasko sikavno than, no godova našti ćerdasaspes kaj vo či inćarel džanglipe andar teorija. But lačho ašunipe thaj kan si, sar vi kamipe, no godova či sas kova so trubul. Zumadine vi te džan po privatno sićope, no godova sas but kuč palo lengo familijako budžeto. Avela baro bibahtalipe te zbogal finansijaće pharimata kala trin čhavrra ačhen bizo đilabimasko sićope thaj pala godova trubul te araćhelpes o varo te ažutisarelpes lenđe ande godova. Dži akana, sa so sićiline, sićiline korkorre, a sićiline but. Čače si kaj pašo ažutipe džangle manušengo majsigo thaj majlačhe therena anglunipe thaj čačarena piro potencijalo sastimava.

 

E familija Petrović si sikadipe katar čačimasko bijandimatarnengo pharipe bućarimasko thaj lesamlipe čhavorrengo. Kana o Dragano del svaro pale pire čhavrra, ando lesko krrlo haćarelpes baro kamavipe, sar vi kotor grižako katr kova so avel. No, paša lengo mištardipe thaj kamavipe palo đilabipe, paćas kaj si kova so avel majlačhe katar sa kova so haćardine thaj ačhadine pala peste.