(H)EDERLEZI – MAJBARO SUMNALO RROMENGO ĐES

Kava sumnalo đes lelpe sargod granica (hona) maškar ivend thaj o milaj, sumnalo đes phanglo palo sastipe ćherutnengo, abjav thaj prandipe ternengo andar o ćher, džuvdimatengo bijandipe, lačho sumbosko ćidipe. Bršenca e Rroma po Ederlezi semnosarenas e primovara thaj teljaripe neve dromarimasko e čergava.

 

Po Ederlezi ašundolpe Rromani muzika, ćhelelpe Rromano oro. Utsvalin les e Rroma trujal sasti Evropa, bizo godolesko čefal paćavimasko si, odolaće kaj si vov pala amende majbaro katar paćavimasko sumnalo đes. Themesko adeto phanglo palo Ederlezi butimaske si averčhandutne thaj barvale. Inćarenpe majsig thaj majposle o Ederlezi, sadanutnes majsigo so inkljel o kham.

 

Anglo sumnalo đes, e Rroma čhinen terni salčin, kitonla e khuvde luluđengo thaj e luluđenca thaj pusaven ande phuv. E ćhera šukarenpe luluđenca thaj luluđarde krangorrenca ando simbolo majnaves primovara.

 

Pe isto čhand pherelpe vi bakhrano ćiralipe – bumbara – učhardo gugle thudeja thaj angrenca thaj peko. Po dujto thaj trito đes džalpe ande goste. Phenelpe kaj si o Ederlezi džikaj si o bakhrano mas, a o šoro halpe po trito đes.