ĐESA PALE POEZIJA KATAR TRIFUN DIMIĆ

Aleksandra Aleksandrović ando alav ćidimasko „Phralipe – Novi Sad“, mothoda kaj o kamipe manifestacijako si lesamallipe, majbuhljaripe thaj arakhadipe dejaće čhibjako. Palo finansijako zurjavipe udžilo sas Pokrajinako sekretarijato palo sićope, ramosarimata, ortuipe thaj nacionalne minoriteturja – nacionalne amalimata, a direktoro forošće lilarvanako dija o than.

 

Voj inkalda semnipe kale maladimasko odolaći kaj ašunelpes ko sas o Trifun Dimić, so ramosarda, pala soste ramosarda, sar vi pale godova save gîndimata sas ande lešći vrjama.

 

E čhavorra andar štar sikavne thana save džan po sićope rromane čhibjako ke sikavni Aleksandra Nikolić thaj Đorđe Fan đinadine e poezija katar Trifun Dimić, sar vi e poezija katar Rajko Jovanović. E čhavorra sas andar štar sikavne thana „Jovan Jovanović Zmaj“ andar Đurđevo, „Miloš Crnjanski“ andar Žabalj, „Dositej Obradović“ andar Novi Sad thaj „Veljko Vlahović“ andar Šangaj.

 

Đinadipe poezijako sas pe rromani thaj dasikani čhib. Kale štar sikavne thana therdine e naisarimašće lila odolaći kaj line kotor ando projekto. Aleksandra Nikolić, sikavni rromane čhibjako, mothoda kaj si bahtali kaj e čhavorra ćidinepe thaj inkalda kaj si semne te kasave maladimata inćarenpes ando butipe sar či hasarelape e dejaći čhib. „E čhavorra kamen te đinaven pe”.

 

E manifestacija inćarda duj đesa: lilarimasko thaj đilabimasko programo. Palo đilabipe sas udžile e sikamne andar fundosko đilabimasko sikavno than „Isidor Bajić“, Miroslav Gubić thaj Uglješa Vukov, save bašaldine e kompozicije andar romantizmo thaj barok pe harmonika thaj godolesa andipe čuduripe thaj majphardine e poezija.

 

Sava Aleksandrović andar ćidipe „Phralipe -Novi Sad“ mothoda kaj lengo ćidipe efta brša rîndova ćerel kaja kulturna manifestacija. Vo lundžarda kaj si o kamipe projektosko te krozal kulturna manifestacija araćhel, lesamalel thaj majbuhljarelpes rromani čhib.