Semnipe ramosarde Rromane alavengo

Šerutno kale ćidimasko, liparda kaj kaja manifestacija nakhavelpes ande palune efta brša, po naisaripe godoleste kaj si pindžardi sar barimašći katar raštraće institucije thaj kulturaće ćhera (lokalosko korkorroortuipe Forosko Novi Sad, Pokrajinako sekretarijato pale kultura thaj ašunimasko informišipe thaj Ministerijumo kulturako thaj informacijako).

 

Sar kotor katar “Dani Trifuna Dimića” inćardi si vi e promocija lilešći “Romska pesmarica 2”, katar Maja Jovanović thaj Ranko Rajko Jovanović andar Deronje. O lil si ćerdino katar tranda đilja pale čhavorra pe rromani thaj dasikani čhib.

 

Lenđi angluno lil e điljenca inkaldo si ande 2010. brš. Maja Jovanović (sikavimatari rromane čhibjako) mothol kaj si kava lil semno, majanglal, pale kola save bućaren ande sikavne thana e čhavorrenca, kaj si e sikavimatarja kola save lesamalen rromano lilaripe, a krozal late dićhenpes rromani tradicija thaj kulturako barvalipe.

 

Trubulipe rromane amalimasko si te prdal projekturja thaj programurja ande sikavimašće ćhera, majanglal maškar terne manuša araćhel neve manuša save ramosrela neve lila. Godoleja vi majdur avasa dikhline sar them savo haćarel e vrjama thaj than save trubun te len ramosarimatarja thaj lenđe lila, a avel lundžardo vi bućaripe palo arakhadiep thaj lesamalipe rromane čhibjak.