Maripe pale rromane orturja po nacIonalno thaj repubIkano nivelo

Ando oktobro kale bršesko inćarenape losarimata pale nacionalne konsilurja ande Republika Srbija. Pala godova kozom si godova šajipe palo rromano nacionalno minoriteto, sar vi godova kozom si vasno te vi e Rroma aven akterja ando proceso integracijako pire amaliamsko dijam svato e Dragoljubeja Acković.

 

Nacionalno konsilo rromane nacionalne minoritetosko trubul te avel amari majvasni institucija. No, po bibaht vo godova naj. Nisar ando ašunipe či bičhaldem e kritike palo lesko bućaripe. Po kamlipe avela manđe te jekhvar o Nacionalno konsilo akharelma pe jekh katar lesko bešipe sar ulavava mungrro gîndo thaj ideje e leske šerutnenca.

 

Apsolutno, godova si amaro udžilipe, sar či ćerelape te savorra vaćaren o kanono sar kamen. Kanono musaj te lačharel vi e kontrola nacionalo konsilesko. Fundosko udžilipe jekh nacionalne konsilesko si te vo avel funkcionalno.

 

Ande nacionalne konsilurja trubun te bešen manuša save džanen so ažućarelpes lendar thaj save inćaren šajipe te nakhaven piri bući. Kana mothav kaj trubun te aven ando šajipe palo bućaripe, gîndiv pe godova kaj džanen so trubun te ćeren, a niči te „miško- saren e šoresa“.

 

Nakline but brša. But eksperimenturja ćerdinepe thaj zumadinepe opral amen. No, ajde tee zumavas te avas akterja thaj te korkorre čačaras e rezultaturja. Musaj te vareso sikavelpes sar lačhe. Kola save kamen te majlačharen piro trajo či trubun te ažućaren te aver gîndosaren pala lende, no trubun korkorre te zumaven thaj te araćhen piro trajosko drom.