ĆIDIPE PALO VAZDIPE E THEMEŠĆE RROMANE INKLUZIJAKO

Pokrajinaći dikhljarrdi, e Jelena Jovanović, ando Parlamento Vojvodinako pešće kolegenca e Ninoslav Jovanovićeja, raštraće sekretarova ando Ministerijumo pale manušikane thaj minoritane orrte thaj themesko svato, e Ljiljana Mihajlović, šerutnjava pe Kancelarija pale inkluzija e Rromenđi AP Vojvodinako, e Slađanava Teodorović, šerutnjava po Konsili pale integracija e Rromenđi AP Vojvodinako, e Stevanova Jovanovićeja, šerutneja po Rromano kulturako maškaripe ando Pančevo, Stevanova Nikolićeja, šerutneja po Edukativno maškaripe e Rromengo andar e Subotica thaj Ganimetava Zejnula, studentkinjava master sićimasko, line peste e delegacija andar e Republiko Hrvatsko pe savjako čikat sas o Veljko Kajtazi, dikhljarrdo manuš ando Parlamento thaj manuš andar o Savezo e ćidimasko „ Kali Sara”.

 

Kamipe e delegacijako andar e Hrvatsko si sikavipe e programosko pale inkluzija e Rromenđi thaj vazdipe lenđe thanesko maškar o them, sar vi arrlisaripe e therrdine džangli masko liduj phuvjengo. Dine svato palo vazdipe e avutnimašće kooperacijako thaj majbare čhutimasko thaj inkluzijako e Rromengo ando them. Е Ljiljana Mihajlović, šerutni peli Kancelarija pale inkluzija e Rromenđi naisajli po avilipe thaj mothoda kaj si pale integracija e Rromenđi trubulime lengo pherrdo čhutipe ando themesko, ekonomikano, kulturano thaj politikano trajo. Palo aresipe godolešće kamipesko trubun sistematikane andimata savi e Rromenđe dela majlačho linipe ande kotora ande save si majdukhavne.

 

O Veljko Kajtazi si štarto mandato dikhljarrdo ande Hrvatsko, na samo e Rromengo, numaj maj 11 minoritetonengo save trajin ande Republika Hrvatsko. Gndis kaj kaja kooperacija vi majdur lundžarrdola thaj kaj trujal o arrlisaripe therrdine džanglimasko liduj phuvjako anasa majlačho trajo e Rromenđe thaj Rromnjenđe.