SEMNOSARDO MAŠKARTHEMUTNO ĐIVE DEJIKANE ĆHIBAKO
0
Vakti: 1 min.
An sa e lumia semnosarelpe Đive dejikane ćhibako. Vaćardolpe katar e 6.000 ćhiba, mamuj prognoze đi ko krajo 21.šelbošutnimasko majbut katar e upaš ka meren.
Foto: Kancelarija za inkluziju Roma
Niveli ćhibaće kulturako thaj sićimasko ane Srbija but bizuravol, ćhun sama e lingvistora. Direktori Kancelariako palje inkluzia Romenđi Miloš Nikolić vaćarda e “Novosadsko nevimase” kaj svako duj kurće mudardolpe po jekh ćhib. Fundo te đuvdosarol e ćhib si te nakhadolpe ćhavorenđe, te avel lje institucionalno dumo, piro alfabeto, te laćhardolpe ane sikljarne thaj e medije.
Vov mothol skandinavsko modeli an savo si po efta ja ohto časora ano kurko dejikani ćhib, a ane Grčka si majcra inja časora. Ke amende si gova katar angluno đi ko panđšto klasa panđ časora ano kurko, katar o šovto đi ko ohtoto štar časora ano kurko, ane maškarutni sikljarni, gimnazije hembut štar časora, đi ane stručno sikljarne vađaj mukljardino.
Kana si lafi katar e romani ćhib e elementonca nacionalno kulturako savo ane vojvođansko fundose sikljarne sićolpe majbut katar e 20 boš, a ano aver kotor Srbijako ak duj sikljarne boš, o Nikolić sikavel imortantipe te avel akava predmeti, thaj ašuđarel kaj svako sikljarni an savi si interesiripe te sićolpe romani ćhib, akava predmeti ćhulpe sar alosarno predmeti savo ka sićolpe sar te na trin časora ano kurko.
Sar vaćarel, e Kancelarija pala inkluzija Romenđi an akava boš ka nisil iniciativa te implementirilpe projekto savo ka avel lje resipe te e romane sikljarnenđe araćhen thaj anen pustika thaj didaktičko materiali te sićolpe romani ćhib.
O.V.