KANA KAMES ĆIRI BUĆI
0
Vakti: 2 min.
Intervju e Zoricava Kalanjoš, pedagogikane asistentova ande fundosko sikavno than „Dušan Radović“ ando Novi Sad
Foto: A.N.
Sar andine e odluka te ćeren e bući sar pedagogikano asistento?
- Majanglal ćerdem bući ande angleškolaći ustanova pale Rromane čhavra savi bučholas „Korak po korak“ ando Bačko Monoštoro thaj sas po šukaripe manđe godovo kaj šaj te ažutiv e čhavrenđe thaj te vazdav lengo džanglipe po majvučo nivelo. Angleškolaći ustanova sas po butipe sukcesutni. Kana nakhli varesavi vrjama, inklisto o konkurso palo pedagogikano asistento thaj me siđarimava konkurišisardem thaj dobisardem e bući.
Dal agorisardine varesavo dosićope palo pedagogikano asistento?
- Agorisardem o sikavno than savo nas phanglo pale bući ande angleškolaći ustanova thaj ande sikavne thana. Numaj, manđe kaja bući sas po butipe šukar thaj athoska ramosardem vuči škola pale vaspitača te avelma o džanglipe adekvatno mungre bućaće. Kana e pedagogikane asistenturja teljardine te bućaren, sasmen butimaske obuke sar kaj si e modulurja thaj treningurja pe save bršenca džasas thaj agorisardam len ando kova nakhlo brš.
Kozom čhavora džan ando Tumaro fundosko sikavno than?
- Kava si baro fundosko sikavno than. Si džike 2000 sikle ande trin objekturja.
Dal sas Tumenđe jasno so haćarel tumari bući?
- Ando teljardipe e bućako nas odlaće kaj malavasas men e pharimatenca ande škola. E bućarne ande sikavne thana gîndinas kaj sam amen varesošći kontrola savi dićhela lenđi bući kaj khonik či džangla so semnosarel o pedagogikano asistento. E sikavimatarke holjarenaspe kaj haćarenas kaj o pedagogikano asistent oči trubul len, no akana si averčhande bući. Sas man e baht odolaće kaj o direktoro savo sas athoska sas les o kan pale mungrri bući thaj pala mande, thaj andegdata sikadaman sar o ažutipe a niči e kontrola.
- Trujal 50 čhavra teljaren ando angluno klaso, numaj džiko ohtoto klaso aresen samo trujal dešu pandž džene. But lendar kana aresen ando pandžto klaso mećen e škola. Lačhe čhavra džan ando inostranstvo thaj kana irisarenpe hasaren o kontinuiteto, odolaće musaj te miškuislen ando sikavno than pale bare.
Čefal poruka bičhaldinesas Tumare siklenđe?
- Sićope si ćija palo pozitivno averčhandipe thaj majlačho trajeto. Sa šaj te ćeren, numaj samo kana silen o džanglipe. Kava vazda vaćarav lenđe, e čhejorenđe posebno kava vaćarav pe radionice kozom si o sićope importantno. Varesave lendar paćan, numaj varesave čez e tradicija udainpe rano.