TRAJISARIPE KATAR PIRO BUĆARIPE – MAJLAČHO BAHTALIPE
0
Vakti: 1 min.
Ćidipe e Rromengo „Romano anglnipe“ therda e šeja pale ašunimaske bućarimata pe teritorija katar guverna Pećinci. Dijam svato e Ivanosa Jovanović, šerutnesa kale ćidimasko.
Foto: A.N.
Ande guverna Pećinci ašunimaske bućarimata nakhavenpes ande trin rromane thana: Obrež, Kupinovo thaj Popinci. Vi paše godova kaj rromane thana si inja, katar khetanimasko đindo 15 lokaloske ćidimata, amen či aresalam te sa ćeras.
Vrjamako periodo si štar čhona – katar juno džiko septembro. Dži akana ćerdem majbut katar opašin thaj paćav kaj džiko agor aserimasa gatisarasa sa, sar vi sas ando plano.
But si semni, fuljardam katar biroo efta manuša. Godova si lačhe vi pala raštra, sar vi pale manuša save si angažuime pe bućarimata. Von inćaren poćin katar 28,000,00 dinarja thaj poćinde si lenđe molimata palo dromaripe. Godova si but lačho varo te e manuša šaj te trajisaren katar piro bućaripe, a niči katar socijalno ažutipe thaj avela lačhe te si majbut kasave konkursurja.
Kancelarija pale inkluzija e Rromenđi thaj manuša andar ortuimasko odboro, Ninoslav Jovanović, savo sas ando kontakto e BGĆ “Praksis” andar Beogrado, ćerdem majbut katar šovardeš personalne dokumenturja. Či ačhava pe godova, avela majbut. Kale šajimasa kamav te mothav e Rromenđe save trajisaren pe teritorija katar guverna Pećinci, a najlen personalne lila te akharenma po telefono.
Si but firme ande guverna Pećinci save šaj te bućaren varesavo đindo e Rromenog pale sa jekh vrjama. Najmen ni jekh Rrom savo si bućardo ande institucije ande amari Guverna thaj godova si bezah.