BUĆAKO BUHLJARIPE

Palo kava projekto e Ana ašunda katar o Rromengo koordinatoro, Jelica Mišković, thaj sas tromali te konkurišil thaj te zumavel te putrel ćerimaski (građevinsko) firma odolaće kaj lako rrom već deš brš ćerel godoja bući. Semno kale projektosko pala lende sas ando čačipe kaj majlačhardine piro bućaripe. E finansijako ažutipe katar o projekto labardine gajda kaj ćindine o alato savo nas len, a trubulas len te majlačhe, majsekcesutne thaj majsigo agorisaren e bući. Ćindine e skele, save si po butipe kuč, hamisarne thaj aver majhurdo alato.

 

Knjigovođa thaj mentoresko ažutipe kana trubunas te registririn e firma thaj anglune pasurja ando lengo bućaripe si katar baro semnosaripe, odolaće kaj si pe kasavo čhand majloćardo lengo drom thaj majloće šaj te arakhadonpe ande bućarimaske paja.

 

Odolaće kaj ande skoro avindi vrjama naćhela o obligaciono periodo katar brš đes trujal savo e komintenturja projektoske musaj te avel len putardi firma, phučlam e Ana Mišković čefal si laće planurja, dal voj thaj lako rrom vi majdur kamen te avel len registruime firma. O svatoirisaripe sas potvrdno, so si baro simbolo kaj o projekto sas sekcesutno. Reso nas te e firma bućarel samo brš đes, numaj te e bućarne save putardine e firma lundžaren piri bući vi ando avindo periodo savo nas dikhlino e projektova. Avilam džiko džanglipe kaj pale lenđi sekcesutni bući trubul len još nekozom hamisarne thaj hurdo alato, numaj kaj e vrjamava si kamle te ćinen vi godova.