LUNDŽAREN MAJDUR THAJ NA AČHEN KATAR O SIĆOPE
0
Vakti: 2 min.
Sar but lačhi sikamni ande fundošći thaj maškarutni sikavni, e Mirjana Sulejmanović sikada sar o therrdo šajipe šaj te nakhadol po majfeder šajipe.
Foto: KIR
Akana si pe doktorske studije kamimava te bućarrdol pe pozicija sar rodimatari ando gođaveripe. Ašarimava mothol kaj si Rromnji, promovišil o sićope thaj trujal o aktivizmo promovišil e rromani kultura thaj artistipe.
Mungrro sićope teljarrda pe nesar majaverčhande, dićhimava kaj majranije teljarrdel ande anglalsikavni, ande šov brš teljarrdem ande sikavni FS “Radovan Kovačević – Maksim” ande Lebane. Palem godova kaj e familijava avilem ando Novi Sad, fundošći sikavni pak dem gata khate. Palem godova ramosarrdem sastarrni sikavni “7 aprili”, savi si pindžarrdi po džanglipe savo khote therrdol, savenđe sem naisarrdi thaj socijalne džanglimata save therrdem, a ulade kamlemas te liparav mungrre klasošći Gordana Šobot, save inkljelas manđe ando aresipe kana godova trubulas.
Džanglipe savo ande godoja sikavni therrdem sas lačho fundo pale studije po Tehnološko fakulteto, savo ramosarrdem 2016. brš.
No, kana palem godova rodem sa smeruja po Univerziteto ando Novi Sad, avilo godova kaj losarrdem o Tehnološko fakulteto, thaj si, sićolaspe but e matematika thaj hemija. Trujal dini bari bući thaj kamipe ande studije, teljarrde te aresen e rezultatuja, palem godova but sem bahtali mungrre čhinadimava, dićhimava pe godova kaj po štarto brš trujal o rodipe palo ramosaripe agorimašće egzamosko pindžarrdem o laboratorijako šukaripe thaj andem čhinadipe kaj si o gođaveripe o drom saveja kamav te džav.
Dem gata o fakulteto pe vrjama thaj therrdem o alav diplomirime inženjeri e tehnologijako, sigo pale godova ramosarrdem e master studije, save lačhe dem gata 2021. bršesko e maškarutne molimasko 10,00.
Akana sem fokusirima pe bući e čhavorrenca, promovišiv o sićope, numaj vi e rromano artistipe thaj kultura trujal o ERIAC-o, čhutini sem vi ande projektuja save si phangle palo sastarimasko džungavipe thaj imunizacija, savo nakhadol trujal e Asocijacija terrne volonterengo, savjako sem aktivno membro katar 2020. brš.
Khanči katar kava či avilosas tena avilisasme baro ažutipe thaj haćaripe katar mungrri familija, dad thaj dej majanglal.
Lav sajekh šajipe te dav importantno svato pale sa terrne Rroma save akana maladon ando pharipe, o dinipe thaj bući navek boldel kazom god te avel phare, džan anglal thaj na ačhen katar o sićope, godova ande nesavi vrjama anela tumenđe neve šajimata.
O.V.