ANGLUNI RROMNJI SAR KONSILARRNI PALO SPORTO, TERRNE THAJ SOCIJALNO POLITIKA
0
Vakti: 2 min.
INTERVJU: Živana Živanović, membro katar opštinako konsili ande Sremske Karlovci palo sporto, terrne thaj socijalno politika
Foto: A.N.
Pešće bućava, terrne rromnja save si čhutine ande themešće – politikane buća but drom sikade kaj si e phare bućava thaj bare kamimava šaj te nakhadon majbare pharimata rromane themesko. Sar mothol o rodipe katar e ćherutne thaj maškarthemutne ćidimata, majbare pharimata savenca maladon e Rromnja si harrno sićope, manušikano jekhipe thaj bari diskriminacija ande familija thaj them.
Kale džungalimata, savenca o rromano them maladol e dešbršutnimava palal, jekhutno si šajipe te nakhkadol trujal ketane ćerimava e terrne, sićome Rromenjengo.
Dine gata o Fakulteto palo menadžmento ande Sremske Karlovce, nakhavimava but pharo drom thaj vrjama pherrdi izazovuja. Si mol sa kova so nakhline thaj so dine te aresen džiko fakultetosko lil?
But si importantno te e Rromnja aven ando themutno ćidipe pešće ćidimasko trujal direktno čhutipe ando bivladako sektori, palitikane partije jal trujal nesavo aver drom. Si Rromnja save aresle te theren pesko jekhipe, majanglal ande pešći familija thaj ando sasto rromano them, maškar save sem vi me. Kamavas te sićov thaj te godoleja lav aktivno čhutipe ando andipe e čhinadimasko sar me dijemas mungrro ažutipe ande integracija rromane themesko, majbut Rromnjengo.
Ćeren ando Pokrajinako sekretarijato palo sićope, orrte, orrtuipe thaj nacionalne minoritetuja – nacionalne ćidimata. Kazom si importantno butbršikano therrdo džanglipe pale Tumari bući?
Therrdo džanglipe ando Pokrajinako sekretarijato palo sićope, orrtuipe thaj nacionalne minoritetuja ažutin manđe sar ando domeno e bućako po vazdipe e araćhimasko e orrtengo pale nacionalne minoritetuja, gajda vi trujal averčhande bućasa venca buhljarrdolo interkulturalizmo, afirmacija e multikulturalizmosko, tolerancija thaj ketano trajo nacionalne minoritetonengo.
Čefal si tumaro mandato sar membro katar opštinako konsili palo socijalno politika?
Ćerav pe godova te mungrri bući avel fundome pe konkretne buća save anen majlačho thaj kvalitetno trajo. Socijalno arakhipe musaj te avel putarrdo pale sajekh manuš thaj kupe, bi diskriminacijako thaj favorizacija. Seriozno programo savo si dino amenđe si fundome po timosko bući thaj savorren si amen po gndo kaj si amaro kamipe te ćeras lokalno thagaripe savo si udžile e forutnenđe, savo ande jekh vrjama avela efikasno thaj či avela kuč.
Čefal si Tumaro svato pale terrne Rroma?
Mungrro svato si te aven upotne thaj tena mućhen pešće sune. Naj loko drom džiko lačho rezultato, but pungrre trubul te aven nakhline, numaj po agor sa avel pe pesko than. Avutnipe e terrnengo, a ulade e rromengo, dikhav ande lengo sićope thaj majbari zor te korkorre džan ande korkorrobućarimašće paja. Te das dumo thaj das šajipe sajekh manušešće, majbut po teljaripe e bućarimasko, e terrne sa majbut pesko avutnipe phandena pala pešći phuv thaj pesko than.
A.N.