Kozmetičko salono „Bellezza divina“ - sar uspeho taro baro projekto
0
Vakti: 1 min.
Te das gođi, kaj e Kancelarija pale inkluzija e Rromenđi, khetane e Pokrajinaće sekretarijatova pale privreda, bućaripe thaj jekhetanipe polurjengo, nakhada o projekto „Poboljšanje zapošljivosti Romkinja iz 5 opština u Vojvodini”.
Foto: M. Karadžić
Aleksandra Nikolić si andar than Futog. Gatisarda maškarutno sikavimasko than pala pedikir thaj manikir, kova so ađes bućarel. Čhinada te putarel kozmetikano salono (Bellezza Divina) kaj nakhla but vrjama thaj therda praksa ando kava bućaripe. Kana gatisarda sikavno than bućarda ande but salonurja, aska vi privatno ando piro ćher, odolaći kaj si gajda majloće. „Avili e vrjama te zumavav mungrre salonosa, thaj paćav kaj therava aresipe“, mothol e Aleksandra.
Kana o konkurso teljarda, Aleksandra sigo roda o kontakto thaj varo sar te alavarelpes. Akharda e Kancelarija pale inkluzija e Rromenđi thaj von mothodine laće sa so či džangla thaj gajda gatisarda sasti trubulimašći procedura. Mothol kaj sas vi pharo thaj but neve šeja palo sićope, no godova, no po agor avel lačhe. Mothol vo godova kaj sas la dar te či avel losardi kaj sas but alavadine kandidaturja.
Inkalel kaj sa pale trubulimašće papirja inćarda zurjavipe katar medijatorja, katar bućarne ande Kancelarija. Majphare sas te araćhel o than. Majanglal arakhla jekh lokalo savo sas but šukar, no kuč...Talo but rodipe, arakhla kava lokalo thaj akana si bahtali lesa. „Dićhimasa pe godova kaj kamlam o solarijumo.
Naj manđe po kamlipe nisave uladimata, niči talo polo, niči palo naciono, gîndiv kaj savorra trubun te inićaren šajipe te zumaven ande kova pala soste gîndil kaj si lačho. Si but projekturja ando brš thaj savorra šaj te theren šajipe pala peste. No, te či sas kava projekto, me nisar či putaravas mungrro salono, jal godova avela but pharo, kaj najma gadići love kozom trubul te ćinav sa kova so sima ađes – phenda voj.