KATARAVIPE ALAVESKO RROM
0
Vakti: 1 min.
Ađes malavamen e butimaske alavenca pale Rroma. Šaj te ulavas len ande duj kupe. Ande angluni kupa alavenđi rindosarasa e alava save e Rroma dine korkorro peske a saven si čhinado semnosaripe. Ande dujto kupa alavengo arakhadon e alava pale Rroma, save dine len aver nacionurja.
Foto: Kancelarija za inkluziju Roma
Phirimaske njamonenđe ande averčhandimaske vrjamaće kotora dine si averčhandutne alava. E Rroma sas šelebršutnenca tradine ande averčhandutne maškarimata thaj ande averčhandutni vrjama. Odolaće dine si lenđe koturale alava kana teljarelpe katar o Avganistano po phurab, thaj sa džike Bari Britanija po paščim.
Ando Avganistano si pindžarde talo alav Kauli, ando Turkmenistano sar Multani, ando Egipto sar Gvodari, ande Palestina sar Nuri, ande Persija thaj ando Azerbejdžano e Rromen vazda semnosaren talo alav Karaki, so po Tursko čhib haćarel kova savo manđel lačhimasko dipe.
E Rroma si Indijako etnikosko kotor, majbut arijevsko kataravimava. O Rrom semnosarel manuš (fundo kale alavosko si Man, so po sanskrito semnosarel miškuipe ođako thaj gîndimasko). Naciono talo alav Rroma jal Rroman liparelpe ande Mahabharata thaj ande Višnu Puranama.
Numaj, tale kava alav aver nacionengo osim e Rroma naj ni ande Indija ni khatende ando them. Po angluno kongreso e Rromengo, savo inćardape katar 6– 8. aprilo 1971. brš ando Londono, andinepe agorisarimata palo phučipe emancipacijako thaj afirmacijako e Rromengo ando them thaj vi amende. Ando angrusnipe andine agorisarimatengo, andape o alav Rrom (Rroma) pale sa džene Rromane etnikosko ando them.