Detot autobusurja pala Rroma
0
Vakti: 1 min.
Zumadipe katar šerutno guvernako Borgaro Torineze, savo si deš kilometrurja katar foro Torino, te anen detot autobuska linija pala Rroma ćerda but zurali reakcija katar političarja save ađes pala kava lesko mothodipe inkaldipe sar kaj si periodo aparthejdosko ande Južna Afrika.
Foto: Kancelarija za inkluziju Roma
Šerutno guvernako Borgaro Torineze, Klaudio Gambino andar Demokratikani partija (PD) mothoda kaj kamel te anel detot autobusurja džiko than ando agora ande save trajin 600 manuša Rroma „save inćaras majbut katar 20 brša“, inkalda AFP.
„Sar garancija palo arakhadipe amare forutnengo trubulipe si te simen duj autobusurja. Jekh pala forutne thaj aver pala Rroma“, mothoda Gambino, inkaldine e italijaće medijurja. Vo lundžarda kaj ande autobusurja butimasa ćerenpes čordimata thaj atakurja.
Dikhlardo ande forosko parlamento Luiđi Spineli andar Levicaći Paritja, ekologija thaj tromalimata (SEL) zurjarda mothodipe šerutne forosko, so ćerda bilačhipe pala lidero godole strankako Niki Vendola, savo mothoda pala italijanska „Stampa“ kaj dinipe averčhande orturjengo akharel arapthejd thaj akharda Gambinos te inke jekhvar gîndil so mothoda, Supervizor palo paćivalipe orturjengo ande PD Mikaela Kampanja mothoda kaj e stranka mothoda Gambinošće kaj „marginalizacija nisar naj čhinadipe thaj kaj mothodipe pe bilačhipe manušengo či anela lačhipe ando gatisaripe pharimatengo.“
Lesko plano zurjarda vi antimigraciona partija Severna liga, a jekh katar lungobršesko dikhlardo Roberto Kalderoni mothoda kaj si godova realne pharimata save si. „Bahtarav ortuipe Borgaresko, savo, vi oaša godova kaj si levičarsko, ašunel so mothol o them.