Populaciako cenzuso ano Montenegro: O gin e rromenqo maj tiknǒl, akana von si 0,9%

Prekal o rezultatija taro gindipe kerdo ko Decembri taro nakhlo berš, 5.629 Roma dživdinena ko Montenegro so si 0,9% taro sasto populacia. Akala date sikavena kaj o numero e membrengo e romane komunitetosko si maj cikno komparativno e ​​genipnasa kotar o 2011. berš, kana sine registririme 6.251 Roma, jali 1% taro populacia.

 

O portalo "Newipe.net" raportil kaj o maj baro kotor e Montenegroske citizentonge deklarisarde pes sar Montenegro - 41.12% (256.436), kana e Srbija keren 32.93% e populaciako (205.370). Mashkar aver minoritetno grupe, e Bosniakura keren 9,45%, e Albancura 4,97%, a 1,63% e themesko deklarisarde pes sar muslimanura.

 

Amen vakargjam e Stefan Berisaj Romeja taro Kotor, kova sikavela kaj o cenzusno date mothoven kaj trubul majbaro socijalno angažmano te šaj te integririnel pe i romani komuniteta.

 

“Amaro komuniteti sito anglal buteder pharipa, angleder ano siklipe thay buti. O tiknjaripe e numerosko e Romengo prekal o cenzusi šaj te ovel indikacia kaj but džana te roden pošukar dživdipe, numa odova sikavela vi bibutjako suporto ko lokalno nivelo”, vakarga o Berishaj.

 

Vov akcentirinel i importanca kotar majbari inkluzia e Romengi ko socijalno procesia thaj dodarela kaj sistemsko paruvipe si trubujipe te sigurinen jekhutne hakaja sa e Montenegroske dizutnenge.

 

“Trubuj te fokusirisaras majbut pe edukacija e ternenge, soske godova si o ključno palo avutnipe e romane komunitetosko. Bi edukaciako, amare čhave nane len sa odola šanse sar aver čhave," vov majdur phenel.

 

Palo tiknipe e numerosko e Romengo, o Berishaj mothovel vi o problemi e ćaćune cenzusako e komunitetosko, soske but našti sine te pheren sar trubul formularia ja te deklaririnen pe sebepi čhibjake bariere.

 

„Isi kazura kote o manuša na sine ni registririme jali našti sine te deklaririnen pe sar Roma. Kodo si jekh aver problemo so si amen”, phenel o Berishaj.

 

O tiknjaripe e numerosko e Romengo an i Montenegro vazdel importantno pučipa baši integracija thaj pozicija tari akaja komuniteta. Dzi kote e date sikaven jekh ciknjaripasko trendo, o Stefan Berishaj thaj but aver gndinena kaj trubul te kerel pe pobuter buti baši edukacia, buti thaj socijalno suporto te šaj sigurinel pe majšukar dživdipe e romane jekhinake an i Montenegro. O gin e manušengo 2023-to beršesko numaj konfirmisarda kaj si than vash progreso ki socialo inkluzia kadale minoritetno grupako.

 

O.V.